هلا فبراير إلى الاسوأ

posted by outlawq8 comment: 4

الواحد مايدري شيقول شيخلي عن هالمهرجان الي “اسمه” مهرجان بس وماشفنا منه ولا شي لا ترفيهي ولا توعوي ولا بطيخي وكل مالهم كل سنه ينزلون ويصير مهرجان ماله داعي, الكرنفال الحلو الي اييبولك جم واحد كويتي وجم واحد بنقالي وجم واحد هندي ومادري منو بعد ويتمشون بالشارع بالغبار وبعدين؟! شنو استفدنا؟ هذا يعني افتتاح المهرجان والله شي يزعل دول الخليج تسوي مهرجانات سنعه المفروض نتعلم منهم بس وين الي يسمع؟ مادري شنو العبره من هالمهرجان

“أكد رئيس مجلس الإدارة والعضو المنتدب في المركز العلمي المهندس مجبل المطوع ان مهرجان ‘هلا فبراير’ ساهم في احداث نقلة نوعية في السياحة الكويتية وعمل على انعاش الجذب السياحي من الدول المجاورة”

اي يجذبهم مره وحده وبعدين يتحسفون ويلعنون الساعه الي يو فيها؟ ماشفت بهل مهرجان لا فعاليات يديده ولا شي وبس المعتاد, تلفزون الكويت يفتر بالمجمعات والسؤال التقليدي “شرايك بديرتك الثانيه الكويت؟ عجبك المهرجان؟” اكيد الي بتسئلونه بيجاملكم وغير تلفزون الكويت بس زادت الزحمه عشان يقولكم المحلات مسويه خصومات “تصل الى 70%” عفيه تنزيلات, قبل المهرجان تلاقي سعر الشي دينارين وبعد المهرجان تلاقي حاطين “السعر القديم” ب5 دنانير وشاطبين عليها كاتبين “السعر الجديد” دينارين لول, والتطور الي زاد انهم زادو حفلات الاغاني “وايد عليكم” تطور ها؟

بس احلى مافي الموضوع انه الديره كلها اعلام ووين ماتروح تلاقي العلم “يرفرف” وهذا عشان يوم التحرير بعد مو عشان المهرجان 😛

و لعل وعسى المهرجان هذا يتقدم ونشوف الاحسن ونرجع فوق مثل ماكنا, لا مهرجان سنع ولا منتخب سنع؟ امصخت السالفه

واتمنى لكم قضاء وقت ممتع في فعاليات هلا فبراير وانشالله تطلعون بالتلفزون وتفوزون بالجوائز

4 responses to “هلا فبراير إلى الاسوأ”

  1. Missy says:

    laish hala february mn el asas? shnw 9ar fee feb.? 😛

  2. outlaw says:

    شلونج مسي شخبارج؟ زينه؟ :×××

    الله يسلمج بشهر فبراير الكويت تحتفل بيوم الاستقلال الي اهوه 25 فبراير ويوم التحرير الي اهوه 26 فبراير, فا سوو مهرجان هلا فبراير بهل شهر عشان عندنا فيها مناسبتين حلوين, يبيلج زياره حق الكويت تعالي واستانسي بهلا فبراير عندنا 😛 يمكن يحطونج بالتلفزون وتشاركين بمسابقاتهم وتربحين هدايا

  3. Missy says:

    i was there in Dec. 😀
    ma7eb ayeey fee feb wayed z7maa 😛

  4. outlaw says:

    انتي الخسرانه وبيطوفج التلفزون والجوائز (مادري شفيني على التلفزون) وبعد عندنا سيرك 😛

Leave a Reply

 
 
 
footer_bg.png